தமிழிலும் வடமொழியிலும் புலமை பெற்ற உ.வே.சா.வுக்கும் பண்டிதமணி கதிரேசனாருக்கும் ஆங்கிலேயர் ஆட்சிக் காலத்திலேயே பெரும் பேராசிரியர் (மகாமகோ உபாத்யாயா)பட்டம் வழங்கப்பட்டது.
தமிழறிஞர் தெ. பொ. மீனாட்சி சுந்தரனார், நாமக்கல் கவிஞர் இராமலிங்கனார், கவிஞர் வைரமுத்து முதலான தமிழறிஞர்கள் இந்திய அரசு வழங்கும் பத்ம பூஷண் விருது பெற்றுள்ளனர்.
சாகித்திய அகாதெமி விருது பெற்ற தமிழ் எழுத்தாளர்களில் பலர் தமிழில் முதுகலை / முனைவர் பட்டம் பெற்றவர்கள்.
பல்கலைக்கழக நிதிநல்கைக் குழு (UGC அமைப்பு) திரைத்துறையில் சத்யஜித்ரே, இசைத் துறையில் எம். எஸ். சுப்புலட்சுமி ஆகியோருக்கு வழங்கிய தேசியப் பேராசிரியர் (National _ Professor) என்னும் தகுதியைத் தமிழ்த்துறையில் முனைவர் தமிழண்ண லுக்கு வழங்கியது.
அயல்நாட்டுப் பல்கலைக்கழகங்களில் தமிழ் பேராசிரியர்களாகப் பணியாற்றவும் பள்ளிகளில் ஆசிரியராகப் பணியாற்றவும் வாய்ப்புகள் உள்ளன.
1984 இல் இ.ஆ.ப. தேர்வை முழுமையாகத் தமிழில் எழுதி வெற்றி பெற்ற முதல் தமிழ் இலக்கிய மாணவர் ஆர். பாலகிருஷ்ணன் இஆப. தற்போது (2018) ஒடிசா மாநிலத்தில் கூடுதல் தலைமைச்செயலாளர் பதவியில் உள்ளார்.
பொறியியல் / வேளாண்மைப் பட்டதாரியாக இருந்து இ.ஆ.ப. தேர்வை முழுமையாகத் தமிழில் எழுதி வெற்றி பெற்ற இ.ஆ.ப. அதிகாரிகள் பலர் தற்போது தமிழகத்தில் பணியில் இருக்கிறார்கள்.
இ.ஆ.ப. தேர்வில் தமிழை விருப்பப் பாடமாக எடுத்து, பட்டதாரிகள் பலர் ஆண்டுதோறும் வெற்றிபெறுகின்றனர்.
திரைத்துறையில் சிறந்த இயக்குநருக்கான தேசிய விருது பெற்ற தமிழ்த் திரைப்பட இயக்குநரும் சிறந்த பாடலாசிரியருக்கான தேசிய விருதை ஏழு முறை பெற்ற ஒரே இந்தியத் திரைப்படப் பாடலாசிரியர் என்ற சிறப்பைப் பெற்ற தமிழ்க்கவிஞரும் தமிழ் இலக்கிய முதுகலைப் பட்டதாரிகளே.
தமிழ் மொழியில் சரளமான பேச்சுத் திறனும் நகைச்சுவை உணர்வும் கொண்டவர்கள் தொலைக்காட்சித் தொகுப்பாளர்களாகவும் தொலைக்காட்சி நிகழ்ச்சி நடத்துநர்களாகவும் புகழ் பெற முடியும். அதன் வழியே திரைத்துறையில் நுழைந்து வெற்றி பெற்றவர்கள் பலருளர்.
0 கருத்துகள்