அஷ்டாங்க ஹ்ருதயம் என்பது ஓர் ஆயுர்வேத மருத்துவ நூலாகும். இது சஸ்கிருதத்தில் எழுதப்பட்டது. இது பண்டைய இந்தியாவின் மூன்று முக்கிய ஆயுர்வேத நூல்களில் ஒன்றாகும்.
இந்நூலின் ஆசிரியர் வாக்படர் ஆவார். இவர் வாழ்ந்த காலம் 550-600 என்று கருதப்படுகிறது.
சரக சம்ஹிதை, சுஸ்ருத சம்ஹிதை ஆகிய புத்தகங்களுக்குப் பிறகு, மிகவும் தெள்ளத்தெளிவாக எழுதப்பட்ட ஒரு நூல் இது.
‘அஷ்டாங்க சங்கிரஹம்’ என்ற ஒரு பெரிய நூலின் சுருக்கம் இது. இதை எழுதித் தொகுத்தவர் லகு வாக்படர். இது முழுக்க முழுக்க நோய்க் குறியீடுகளையும், தத்துவங்களையும், நோய்க்கான சிகிச்சையையும் கூறுகிறது.
சரக சம்ஹிதை மருத்துவத்துக்கும், சுஸ்ருத சம்ஹிதை அறுவை சிகிச்சைக்கும் சிறந்த புத்தகங்களாகத் திகழ்கின்றன.
அஷ்டாங்க ஹ்ருதயம் இரண்டிலும் உள்ள சாரத்தை எடுத்துக்கொண்டு அறுவை சிகிச்சைக்கும், மருத்துவச் சிகிச்சைக்கும் ஒரு நன்னூலாகத் திகழ்கிறது.
இந்தப் புத்தகத்தில் ஆறு பிரிவுகள் உள்ளன, 120 அத்தியாயங்கள் உள்ளன. ஆயுர்வேதத்தின் எட்டு அங்கங்களின் ஹ்ருதயம் போல இந்நூல் விளங்குகிறது.
1935-ம் ஆண்டு பண்டிதர் துரைசாமி அய்யங்கார் வடமொழி சுலோகங்கள் இல்லாமல் தமிழ் மொழியில் அஷ்டாங்க ஹ்ருதயத்தை வெளியிட்டார். பின்னர் வடமொழியுடன் தமிழ் உரை சேர்த்துப் பெரிதாக வெளிவந்தது.
0 கருத்துகள்